Монгол Улсын Ерөнхийлөгч Халтмаагийн Баттулга /2020.09.21/ Ховд аймгийн Булган суманд ажиллалаа. Энэ үеэрээ Ховд аймгийн Булган, Алтай, Үенч сумын иргэдтэй уулзаж, тэдний санал бодлыг сонсож, нээлттэй ярилцав.
Уулзалтын үеэр Монгол Улсын Ерөнхийлөгч Халтмаагийн Баттулга иргэдээс сонгогддог албан тушаалтнууд иргэдээ байнга сонсож байх нь чухал гэдгийг онцолж, ялангуяа алслагдмал бүс нутагт амьдардаг иргэдэд дуу хоолойгоо хүргэх боломжийг олгож, тэднийг дэмжих хэрэгтэй гэж үздэг гэдгээ хэллээ. Мөн иргэдийн зүгээс тавьсан говийн бүсэд өрнөж буй төмөр замын бүтээн байгуулалтад оролцох саналыг сайшааж, баруун бүсэд төмөр замын төслийг хэрэгжүүлэх цаг нь болсон гэв.
Түүнчлэн Дорнод аймгийн Халхгол суманд амжилттай хэрэгжүүлсэн “Шинэ сум” төслийг Булган суманд хэрэгжүүлэх тухай хүсэлтийг Монгол Улсын Ерөнхийлөгч Халтмаагийн Баттулга нааштайгаар хүлээн авч, төсвийн бус хөрөнгөөр шийдвэрлэх боломжийг эрэлхийлж ажиллахаа илэрхийллээ.
Ховд аймгийн Булган сумын иргэн Сүхдээ:
“…Мал аж ахуйн түүхий эд бэлтгэлийн асуудлыг цаашид яаж хөгжүүлэх вэ? Түүний дотроос шуудхан ярихад залуу хүмүүс мал маллах дургүй болж байгаа. Залуу хүмүүс мал маллахад нь урамшуулал олгох тал дээр анхаарч өгмөөр байна.”
Ховд аймгийн Үенч сумын малчин Н.Бөхсуурь:
“…Юуны өмнө монгол малыг дэлхийн зах зээлд хүргэхдээ гурван талт худалдааны бодлого хэрэгжүүлэх, яаж хүргэх талаар малчид бид ярилцмаар юм аа. Мөн монгол төгрөг ямар ч чанаргүй болоод байж байна. Монгол төгрөг гэдэг бол төрийн мөнгөн тэмдэгт. АНУ-ын доллартай харьцуулахад илүү чадамжгүй байгаа мөнгө юм. Бид мөнгөө чанартай болгохын тулд монгол малыг дэлхийн зах зээлд харилцан ашигтай худалдааны бодлогоор хүргэмээр байгаа юм.
Тууль гэдэг бол Төв Азийн, хүн төрөлхтний аман зохиолын чухал төрөл. Та монголчууд Жангар гэх мэт туулиа, түүхээ илүү сонирхох талаар ажиллаж, туульчтай болсонд баярлаж байгаа.”
Ховд аймгийн Булган сумын иргэн Нэргүй:
“…Тэтгэврийн бодолтын талаар санал оруулъя гэж бодож байна. Тэтгэврийг тогтоохдоо таван жилийн цалингийн дунджаар бодож олгодог байсан. Одоо долоон жилээр боддог болсон. УИХ-ын гишүүд болон бодлого тодорхойлогчдод хандаж энэ үгээ хэлж байна аа. 650 мянган төгрөгийн цалин авч байсан хүн 350 мянган төгрөгийн тэтгэвэр тогтоолгохоор хар ухаанаар бодоод үзэхэд ядуурлын эгнээнд орж ирж байгаа биз? Энийг олон удаа санал асуулгад тавьсан ч хэрэгжихгүй байгаа юм. Тэтгэврийн тогтолцоон дээр ер нь нэг реформ, өөрчлөлт хийвэл яасан юм бэ?”
Ховд аймгийн Булган сумын иргэн Х.Санак:
“…Малын хулгайтай тэмцэх тухай ард түмэн маш их ярьсан. Үүнийг УИХ анхааран судалж үзээд, хууль гаргасан. Тэр хуульд нэг ямаа эсвэл шүдлэн хулгайлсан иргэн би байвал 2-3 жилийн ял оноохоор болсон. Гэтэл төр засгийн мөнгийг ямар нэг хэлбэрээр ашиглаж, тэрбум төгрөгийг хувьдаа завшсан хүмүүс байгаа шүү дээ. Энэ хүмүүс ямар ял авч байна вэ?”
Булган, Алтай, Үенч сумын 66 ээжид “Эхийн алдар” одон гардууллаа
Монгол Улсын Ерөнхийлөгч Халтмаагийн Баттулга өнөөдөр Ховд аймгийн Булган суманд ажиллах үеэрээ Булган, Алтай, Үенч суманд амьдардаг ээжүүдэд “Эхийн алдар” одон гардууллаа.
МОНГОЛ УЛСЫН ЕРӨНХИЙЛӨГЧ ХАЛТМААГИЙН БАТТУЛГА ЭЭЖҮҮДИЙН ОДОНГ ГАРДУУЛСНЫХАА ДАРАА:
“Монголын сарангоо ээжүүд ээ,
Элбэрэлт эхчүүд ээ,
Булган, Алтай, Үенч сумын иргэд ээ,
Та бүхэнд энэ өдрийн мэндийг хүргэж, Монгол Улсын ирээдүй болсон хүүхэд, багачуудыг сэтгэл тэнүүн, аз жаргал дүүрэн өсгөн бойжуулж байгаад тань халуун талархал илэрхийлье.
Дэлхий дахинд тархсан цар тахлын улмаас энэ жил “Эхийн алдар” одонг Хүүхдийн баяраар гардуулж чадаагүй ч нэг сарын өмнөөс засаг захиргааны түвшинд үе шаттайгаар гардуулж эхлээд байна.
Монгол Улсын хамгийн олон хүнтэй сумдын нэг, 10 мянган гаруй иргэнтэй Ховд аймгийн Булган суманд өнөөдөр ажиллаж, баруун гурван сумын эхчүүдэд “Эхийн алдар” одонг нь өөрийн биеэр гардуулж байгаадаа миний бие туйлын баяртай байна.
Булган сумаас 35 ээж, Үенч сумаас 14 ээж, Алтай сумаас 17 ээж өнөөдөр “Эхийн алдар” Нэг, Хоёрдугаар зэргийн одонгоо гардан авлаа. Үзэсгэлэнт ээжүүддээ болон гэр бүлд нь халуун баяр хүргэж, улам өнөр өтгөн болж, айл хотлоороо түвшин амгалан аж төрөхийг хүсэн ерөөе!
Мөн Алтай сумын иргэн Баатаржавын Эрдэнэхуягт төрсөн өдрийн мэнд хүргэж, аз жаргал хүсье.
Ээж хүний үрдээ гаргасан хэмжээлшгүй их хайр, олон шөнө нойроо хугаслан байж өсгөсөн чин сэтгэл, Монгол Улсын бяцхан иргэдийг эх орондоо ихийг хийж бүтээх ирээдүйн чадварлаг боловсон хүчин болгон хүмүүжүүлж байгаа эхчүүдийн нөр их хөдөлмөрийг төр өндрөөр үнэлж ирсэн.
Ийм учраас эхчүүддээ хүндэтгэл үзүүлж, жилдээ ганц удаа Монгол Улсын Ерөнхийлөгчийн зарлигаар “Эхийн алдар” одонг гардуулдаг уламжлалтай. “Эхийн алдар” одон Та бүхний үр хүүхдүүдийн чинь хүндэтгэл, бахархлын өчүүхэн ч болтугай илэрхийлэл болж чадах байх аа.
Өнөөдөр одонгоо гардан авсан Та бүхэнд болон Булган, Үенч, Алтай сумын нийт эмэгтэйчүүд, ээжүүдэд халуун баяр хүргэж, аз жаргал, эрүүл энх, сайн сайхан бүхнийг хүсэн ерөөе.
Монголын маань үрс маш олон болтугай” гэлээ.
