Монгол Улсын Их Хурлын Ерөнхий нарийн бичгийн дарга Д.Энхбат Бүгд Найрамдах Унгар Улсад албан айлчлал хийж, тус улсын Ассамблейн Тамгын газрын Ерөнхий нарийн бичгийн дарга Дьөрдь Шухтай 2024 оны тавдугаар сарын 29-ний өдөр хамтран ажиллах санамж бичиг үзэглэлээ.Монгол Улсын Их Хурлын дарга Г.Занданшатар өнгөрсөн гуравдугаар сард Унгар Улсын Үндэсний Ассамблейн дарга Көвер Ласлогийн урилгаар тус улсад айлчлах үеэр уг санамж бичгийг байгуулах яриа хэлэлцээг эхлүүлсэн. Хамтран ажиллах санамж бичгийн хүрээнд талууд парламентын ил тод, хариуцлагатай байдлыг нэмэгдүүлэх, Байнгын хороодын бүтэц, зохион байгуулалт, чиг үүрэгт хамаарах асуудал, хоёр улсын парламентын үйл ажиллагааны эрх зүйн үндсийг тодорхойлж буй хууль тогтоомжийг харьцуулан судлах, цахим парламент, номын сан, судалгааны газруудын үйл ажиллагаа, сайн туршлагаас суралцах зэрэг өргөн хүрээнд хамтран ажиллахаар харилцан тохиролцов.Санамж бичиг байгуулах үеэр Улсын Их Хурлын Ерөнхий нарийн бичгийн дарга Д.Энхбат эртний түүхт Унгар улсын нийслэл Будапешт хотод хүрэлцэн ирж хоёр улсын парламент, түүний Тамгын газрын хамтын ажиллагааг шинэ шатанд гаргах үүд, хаалгыг нээж байгаадаа сэтгэл хангалуун байгаагаа илэрхийллээ. Түүнчлэн хоёр орны парламентын хамтын ажиллагааг бэхжүүлэхэд Тамгын газар болон парламентын найрамдлын бүлгийн нягт хамтын ажиллагаа чухал үүрэгтэйг онцлов. Мөн тэрбээр, хууль тогтоох байгууллагын өдөр тутмын үйл ажиллагааг гардан хариуцдаг Тамгын газар хоорондын олон талт хамтын ажиллагааг идэвхжүүлж, хамтран ажиллах тухай харилцан ойлголцлын санамж бичиг байгуулахаар санал нэгдсэнд талархсанаа хэлээд энэхүү санамж бичигт үндэслэн Тамгын газрын ажилтнуудын туршлага судлах солилцооны хөтөлбөр зохион байгуулах, цаашлаад хууль тогтоох чиглэлээрх хамтарсан судалгаа хийх боломжтой гэж үзэж байна гэв.Унгар Улсын Үндэсний Ассамблейн Тамгын газрын Ерөнхий нарийн бичгийн дарга Дьөрдь Шух энэхүү санамж бичгийн ач холбогдлыг өндөр түвшинд үнэлж байгаагаа онцлоод цаашид хоёр улсын парламентын Тамгын газар хоорондын хамтын ажиллагааны цар хүрээ зогсолтгүй өргөжин тэлнэ гэдэгт итгэлтэй байгаагаа илэрхийлэв. Улмаар уг санамж бичгийн хэрэгжилтийг бүрэн хангаж, хамаарах асуудлаар жил тутам үр дүнтэй хөтөлбөрүүдийг хамтран зохион байгуулахад анхаарч ажиллана гэв.
