“Голомт” банкны ТУЗ-ийн дарга асан Д.Баясгаланг цагдан хорьсон нь үндэслэлтэй, эсэхийг түүний өмгөөлөгчийн гаргасан гомдлын дагуу Хан-Уул дүүргийн Эрүүгийн хэргийн анхан шатны шүүхийн ерөнхий шүүгч Ийшээгийн Ганбат өнгөрсөн баасан гарагт хянасан билээ.
АТГ, прокурорын хамтарсан ажлын хэсгийнхэн энэ сарын 22-ны үдэш хойшлуулшгүй ажиллагаа явуулж баривчилсан бөгөөд лхагва гарагт НПГ-аас цагдан хорьж шалгах шаардлагатай байгаа тухай саналаа шүүхэд хүргүүлсэн юм. Тус шүүхийн шүүгч НПГ-ын хяналтын прокурорын саналыг хэлэлцээд “Голомт”-ын Д.Баясгаланг 30 хоногийн хугацаагаар цагдан хорихоор шийдвэрлэсэн юм.
Эх сурвалжуудын мэдээлж буйгаар шүүгч “Дахин гэмт хэрэг үйлдэх үндэслэл бүхий мэдээлэл хэрэгт авагдсан” гэсэн үндэслэлээр Эрүүгийн хэрэг хянан шийдвэрлэх тухай хуулийн 14.9-1.3 дахь хэсэгт заасны дагуу нотлох баримтуудад нь үндэслэн цагдан хорихоор болсон аж.
Харин өнгөрсөн баасан гарагт яллагдагч Д.Баясгалангийн өмгөөлөгч Б.Баяраа нь шүүгчийн захирамжийг хүчингүй болгуулах гомдол гаргасныг хянан хэлэлцээд 30 хоног цагдан хорих захирамжийг Хан-Уул дүүргийн Эрүүгийн хэргийн анхан шатны шүүхийн ерөнхий шүүгч И.Ганбат хүчингүй болгож шийдвэрлэсэн юм.
Ингэж шийдвэрлэсэн нь нийгэмд багагүй хардлага төрүүлж, шүүх, шүүгчид итгэх итгэлд ч иргэдийг эргэлзэхэд хүргэж байгааг олон нийтийн сүлжээнд үзэл бодлоо илэрхийлж буй хүмүүсийн сэтгэгдэлээс харагдаж байна. Мөн тус шүүхийн зарим ажилтан ч ерөнхий шүүгчийнхээ шийдвэрт гайхан эргэлзэж, ямар нэг “хор” орчихов уу хэмээн шивэр авир гэлцэж байв.
Улсын ерөнхий прокурорын албан тушаал хашиж байхдаа бусдаар дамжуулан их хэмжээний хахууль авсан байж болзошгүй гэх хэрэгт шалгуулж буй Д.Дорлигжав нарт холбогдох үйлдэлд “Голомт” банкны ТУЗ-ийн дарга асан Д.Баясгаланг шалгах болсон билээ.
Түүгээр ч зогсохгүй гэр, ажлынх нь байранд нэгжлэг хийснийг хэвлэлийнхэн олон нийтэд хүргэж байв. Д.Дорлигжав, түүний дүү Д.Баатар нарыг “Алтан дорнод Монгол” компанийн Т.Ганболдоос хахууль авахад нь Д.Баясгалан дэмжлэг үзүүлсэн, мөнгө угаасан хэрэгт буруутгасан гэдгийг эх сурвалжууд баталсан.
Учир мэдэх олон хүн хууль сахиулах байгууллагынхныг Д.Баясгаланг шалгаж эхэлсэн тухай мэдээллийн сонсоод шударга шалгаж, хариуцлага хүлээлгэж чадах, эсэхэд эргэлзэж байгаа юм билээ. Учир нь Д.Баясгалан өөрийн холбогдсон хэд хэдэн хэргээс мултарч, уснаас хуурай гарч чадсан байдаг.
Тухайлбал, олны анхаарал татсан, дуулиан шуугиантай, Монголын арилжааны томоохон банкууд холбогдсон “Номаранг”-ийн гэх хэрэгт “Голомт”-ын Д.Баясгалан татагдан, дөнгөж шалгаж эхэлж байтал цагдаа, прокурор, шүүхийн эрх мэдэлтнүүд хэргийг нь хэрэгсэхгүй болгуулсан гэдэг.
Өмнөд Солонгосын “Номаранг” корпорацтай Монголын нэртэй бизнесменүүд хийсэн гэрээний дагуу тус улсын дэлхийд алдартай компаниудаас Монголд бараа, материал нийлүүлэх ёстой байж. Гэвч бараа материал нийлүүлэх гэрээ нь сүүлдээ бэлэн мөнгө болон хувирч, манай арилжааны банкууд болон аж ахуйн нэгж, иргэдийн гарт зээл болж очсон гэдэг.
“Номаранг”-ийн захирал Ок Сүн Лийг аккредитивийн гэрээ зөрчсөн,мөнгө угаасан хэрэгт буруутган БНСУ-ын шүүх зургаан жил хорих ял оноосон түүхтэй. Харин мөнгө зээлж авсан Монголын арилжааны банкууд, аж ахуйн нэгж, хувь хүмүүс олон сая ам.долларын төлбөрт унасан ч хэрэг тэгсхийгээд замхарсан юм даг. Анх “Номаранг”-аас зээлсэн гэх 120 сая ам.долларыг “Голомт”, “Монгол шуудан”, “Тээвэр хөгжил”, “Анод” зэрэг арилжааны хэд хэдэн банк эргэлдүүлж, ихээхэн ашиг олсон гэх бөгөөд “Голомт”-ын Д.Баясгаланг 60 гаруй сая ам.долларын зээлийг банкны хууль тогтоомж зөрчиж, авсан хэрэгт буруутган тухайн үеийн УМБГ-ын Эдийн засгийн гэмт хэрэг мөрдөх хэлтэст шалгаж эхэлсэн гэдэг. Гэвч тухайн үеийн цагдаагийн байгууллагын удирдлага, өнөөгийн эрх баригчдын төлөөлөл болсон нэг бус хүн, улстөрчид гээд олон хүн хэрэгт татагдах, ЦЕГ-ын удирдах албан тушаалтнууд нь мөрдөн байцаагч нартаа байцаагдах болоод байсан учраас хэргийг нь хаасан түүхтэй.
“Номаранг”-ийн гэх хэрэгт холбогдон шалгуулсан 60 гаруй хүнээс хамгийн түрүүнд хэргээс мултарсан нь “Голомт”-ын ТУЗ-ийн дарга асан Д.Баясгалан гэдгийг учир мэдэх олон хүн ярилцдаг юм билээ.
Түүнээс гадна Д.Баясгаланг Тагнуулын ерөнхий газрын Мөрдөн байцаах хэлтэст гурван жил эрүүгийн хэрэгт шалгасан ч тэр хэрэг замхарсан байдаг.
Эргэн сануулахад, тухайн үед ажиллаж байгаад дампуурсан Сэргээн босголтын банкны хэрэгт шалгаж байсан юм. Төрийн өмчит Сэргээн босголт банкийг “Голомт” банктай нийлүүлсэн албан тушаалтнууд эрх мэдлээ хэтрүүлсэн гэх дүгнэлтэд хүрсэн бөгөөд хувийн өмчийн “Голомт” банкны эрх ашигт үйлчилж төрийн өмч хөрөнгийг ашиглан завших боломжийг олгосон хууль бус үйл ажиллагаа болохыг УИХ-ын шалгалтаар тогтоож байжээ.
Төрийн өмчийн 4.5 тэрбум төгрөгийн хөрөнгөтэй Сэргээн босголтын банкийг таван сая төгрөгөөр үнэлэн хувийн банкинд нийлүүлж, нэгдсэн банкны дүрмийн сан 2076.7 сая төгрөг, үүнээс таван сая нь Сэргээн босголтын банкны хөрөнгө, үлдэх 2071.7 сая төгрөг нь “Голомт”-ынх байхаар заасан нь хууль бус, төрийн өмчийг бүлэглэн завшсан үйлдэл гэж тухайн үеэд хэвлэлээр бичиж байжээ.
“Голомт” банк анх байгуулагдахдаа үүсгэн байгуулагчид нь өөрийн ямар ч хөрөнгийн хуримтлалгүй, харин төрийн өмчийн ХОТШ банкнаас 730 мянган ам.долларыг сарын нэг хувийн хүүтэй авч, Монголын талын дүрмийн сангаа бүрдүүлж “зээлээр банкны дүрмийн санг бүрдүүлэхийг хориглосон” хууль тогтоомжийг зөрчсөн, түүгээр зогсохгүй ХОТШ банкинд 200 сая төгрөг эргүүлэн хоёр хувийн хүүтэй зээлүүлж ашгаа нэмэгдүүлсэн.
Дээрх 730 мянган ам.долларын зээлийг ХОТШ банкнаас олгосон тус банкны ерөнхий захирал нь ХОТШ банкыг дампуурсны дараа “Голомт” банкинд шилжин ажилласан зэрэг асуудалд холбогдуулан тагнуулын байгууллага Д.Баясгаланг шалгасан түүхтэй.
Эх сурвалж: livetv.mn
