ОХУ-ын Ерөнхийлөгч Владимир Путин өчигдөр 66 нас хүрсэн БНХАУ-ын дарга Ши Жинпинд төрсөн өдрийн баяр хүргэн хайрцаг орос зайрмаг бэлэглэжээ. В.Путин Тажикистаны нийслэл Душанбед Азийн хамтын ажиллагаа, итгэлцлийн дээд хэмжээний уулзалт эхлэхийн өмнөхөн Ши Жинпиний байрласан буудалд хүрэлцэн ирж бэлгээ биечлэн гардуулсан аж.
В.Путин хоёр орны харилцааны хөгжил дэвшилд Ши Жинпиний оруулж буй хувь нэмрийг өндрөөр үнэлэн Ши Жинпиний ОХУ-д хийгээд удаагүй төрийн айлчлал амжилттай өндөрлөснийг онцолжээ. Ши Жинпин В.Путинд талархал илэрхийлээд түүнийг Хятадад их алдаршсан хүн гэсэн байна.
Хэдэн жилийн өмнө Владивостокт болсон Дорнын эдийн засгийн чуулга уулзалтын үеэр В.Путинтэй уулзсан Хятадын бизнесменүүд эх оронд нь орос зайрмагт их дуртай тухай ярьж байжээ. Үүний дараа ОХУ-ын Ерөнхийлөгч БНХАУ-д айлчлахдаа Ши Жинпинд анх удаа бэлэг болгон орос зайрмаг авчирч байсан аж.
Б.Сансар
