Шинэ Зеландын Цагаан хэмээх арал дахь галт уул дэлбэрсний улмаас таван хүн амь үрэгдэж, найман хүн сураггүй алга болжээ.
Үүнээс гадна 31 хүн түлэгдэн хүнд хөнгөн бэртжээ. Тэдгээрээс 27 хүн 30-аас дээш хувийн түлэгдэлтэй бөгөөд бүгдийнх нь амийг аврах магадлал бага аж. Түлэгдэгсдийг нисдэг тэргээр Шинэ Зеланд төдийгүй Австралийн эмнэлгүүдэд яаралтай хүргэсэн байна.
Галт уул дэлбэрэх үед Цагаан аралд жуулчин голдуу Австралийн 24, АНУ-ын ес, Шинэ Зеландын тав, Германы дөрөв, Их Британи, БНХАУ-ын тус бүр хоёр, Малайзийн нэг иргэн, нийт 47 хүн байжээ.
Цагаан аралд үе үе газар хөдөлж, галт уул ойрын 24 цагт дахин дэлбэрэх магадлал их байгаа нь сураггүй алга бологсдыг хайх эрлийн ажиллагаанд саад болж буй тухай “АВС” телевиз мэдээлжээ.
Б.Төгсөө
